តក់ៗពេញបំពង់ ឆុងៗកន្លះក្រហេត
និយមន័យៈ សន្សំបន្តិចម្តងៗនាំឲ្យស្តុកស្តម្ភ ខ្ជះខ្ជាយនាំឲ្យស្តួចស្ដើង ។
អត្ថាធិប្បាយ
តក់ៗពេញបំពង់
ទឹកត្នោតមួយតំណក់ម្តង មួយតំណក់ម្តង លុះព្រឹកឡើងអាចពេញបំពង់បាន ។ លោកប្រៀបអត្ថន័យនេះទៅនឹងការសន្សំបន្តិចម្តង បន្តិចម្តងយូរទៅអាចគរជាគនរបានយ៉ាងធំ ឬបានច្រើនសន្ធឹកសន្ធាប់ ។ ជាពិសេស គេអាចក្លាយទៅជាអ្នកមានទ្រព្យសម្បត្តិស្តុកស្តម្ភមហាសាលបាន ។ ដូចជា ៖
អ្នកអម្រែកដើរផ្សារឆ្នាំងម្នាក់ប្រឹងសន្សំលុយកម្លាំងញើស បន្តិចម្តង-បន្តិចម្តង ។ ទីបំផុតគាត់ក៏ក្លាយទៅជាគហបតីល្បីឈ្មោះក្នុងទសវត្សឆ្នាំ៥០ នាក្រុងភ្នំពេញ ។ គាត់បានស្ថាបនាពុទ្ធិកមហាវិទ្យាល័យព្រះសីហនុរាជ្យ ជូនជាតិទុកជាកេរ្តិ៍ ដោយទ្រព្យសម្បត្តិគាត់ផ្ទាល់សុទ្ធសាធ ។
កណ្ដៀរខំប្រឹងជញ្ជូនគ្រាប់ធូលីដីយ៉ាងតូចសឹងមើលមិនឃើញ បន្តិចម្តង-បន្តិចម្តង ។ យូរៗទៅវាក៏ធ្វើដំបូកមួយយ៉ាងធំបាន ។
ធុងៗកន្លះក្រហេត
ការខ្ជះខ្ជាយ ឬ ចាយវាយឥតសណ្ដាប់ធ្នាប់ ឬក៏ចំណាយឥតមានមូលហេតុ គឺចាយតាមតែនឹកឃើញ របស់ដែលមិនចាំបាច់ត្រូវចាយ ក៏ចាយដែរ ។ ចំណាយបែបនេះ នាំឲ្យទ្រព្យសម្បត្តិចេះតែហិនហោច រៀវតូចស្តួចស្ដើងរាល់ថ្ងៃ ។ ទីបំផុត គេសឹងតែរកឆ្នាំងដាំបាយពុំបានផង ។ តួយ៉ាងដូចជា ៖
ស្រីកញ្ជើធ្លុះក្នុងរឿង «មាយើង» នៃអក្សរសិល្ប៍ខ្មែរ ។ ដោយនាងអាងថា ខ្លួនគេជាប្រពន្ធនាយសំពៅពាណិជ្ជករធំ ។ គេប្រើប្រាស់ទ្រព្យសម្បត្តិយ៉ាងខ្ជះខ្ជាយ ធុងៗគ្មានគិតពីការហិនហោច ដូចជា ហែកកំណាត់សំពត់ថ្មីៗមកជូតលាមកកូនជាដើម ។
ទីបំផុត ពាណិជ្ជករដ៏ធំនេះទាំងពីរនាក់ប្តី-ប្រពន្ធ ក្លាយខ្លួនទៅជាអ្នកកាន់អំបែងដើរសុំទានគេគ្រប់ច្រកល្ហក ៕
